"Tunzeni utamaduni kwa maendeleo" - Dkt mwakyembe

Posted on: October 25th, 2018

 Wananchi wa Mkoa wa Lindi wametakiwa  kutumia dhana ya utamaduni  ili kujikwamua kiuchumi na kuleta maendeleo.

Wito huo umetolewa na Waziri wa  Habari, Sanaa, utamaduni na Michezo Dkt Harrison Mwakyembe  alipokuwa akifungua Tamasha la utamaduni la Watu wa Mkoa wa Lindi linalofanyika katika Kijiji cha Makumbusho Jijini Dar es salaam Oktoba 25 mwaka huu.

Mheshimiwa Mwakyembe amesisitiza wananchi wa Lindi kujishughulisha na masuala ya utamaduni  kama vile kuhifadhi na kutunza maeneo ya kihistoria yatakayowavutia watalii kutoka maeneo mbalimbali.

“Kwa kupitia utamaduni mtaweza kujikwamua kiuchumi amueni kufanya utamaduni kuwa ni chanzo cha kuleta maendeleo, pia nawapongeza kwa nia ya dhati kabisa na ninawasaa jamii nyingine kuinga mfano wa wanalindi katika kuenzi utamaduni” alisema Mwakyembe

Mwakyembe amesema  kuwa Wizara ya Habari,Sanaa,utamaduni na Michezo itaendelea kuunga mkono wadau wanaoshughulika na kazi ya kulinda na kutunza utamaduni wa taifa na kusema kuwa taifa bila utamaduni ni sawa na taifa mfu.

“Suala la kutunza na kuendeleza utamaduni si suala la Serikali tu ni wajibu wajibu wa kila mwananchi  kufanya hivyo hivyo tusaidiane kuendeleza na kukuza tamaduni zetu” alisisistiza Mwakyembe.

Aidha Waziri Mwakyembe amepongeza uongozi wa Mkoa wa Lindi kwa dhamira njema ya kufanya tamasha la utamaduni na kuendeleza michezo. Pia Waziri Mwakyembe ameipongeza Wilaya ya Ruangwa kwa kujenga Uwanja wa Mpira wa Miguu  wa Majaliwa Stadium uliopo Wilayani humo.

Tamasha  la utamaduni wa Mtanzania mwaka 2018 limeshirikisha Jamii za Watu  wa Mkoa wa Lindi ambapo kila Wilaya inayounda Mkoa wa Lindi inaonyesha Mila na Desturi  zake.

Tamasha  la utamaduni la Mkoa wa Lindi Linafanyika kwa siku nne kuanzia Oktoba 25 hadi Oktoba 28 katika Viunga vya Kijiji cha Makumbusho , Kijitonyama  Jijini Dar es salaam huku kauli mbiu yake ikiwa ni "Lindi utamaduni wetu, Urithi wetu kwa maendeleo".

Chanzo - www.ruangwadc.go.tz